Nakasinati og kusog nga ulan ug pagbaha ang habagatang bahin sa Tsina human sa pag-igo sa Bagyong Noul sa Guangdong niadtong Domingo.
Sumala sa lokal nga mga awtoridad, kapin sa 800,000 ka mga residente ang gipabakwit gikan sa probinsya.
Samtang, kapin sa 350 ka mga flight ang gikansela sa Hong Kong, diin kapin sa 20 ka mga tawo usab ang nasamdan tungod sa kusog nga hangin ug ulan.
Mitugpa ang bagyo sa baybayon sa Huidong County mga alas 3:50 sa kaadlawon, nga nagdala og kusog nga hangin ug daghang ulan.
Nagpagawas ang China Meteorological Administration og pula nga pasidaan batok sa kalit nga pagbaha alang sa mga probinsya sa Jiangxi, Hunan, Guangdong, Sichuan, Shaanxi, Gansu, ug habagatang-sidlakang bahin sa Xinjiang.
Gilauman nga magpadayon ang kusog nga ulan hangtod sa Martes, nga mahimong mopahinabog pagbaha ug pagdahili sa yuta, ilabina sa mga bukirong lugar ug daplin sa mga suba.
Bisan og mihinay na ang Bagyong Noul ug nahimong usa na ka tropical storm samtang misulod kini sa kalupaan, nagpabilin nga taas ang risgo sa pagbaha ug uban pang kalamidad sa mga apektadong probinsya.
Naglaan ang gobyerno og 100 milyon ka yuan o P820 milyon alang sa mga programa sa hinabang ug rehabilitasyon sa Guangdong.
Sa laing bahin, hinay-hinay nang mibalik sa normal ang operasyon sa mga tugpahanan sa Hong Kong human sa kapin sa 12 ka oras nga suspensyon.
