BALAMBAN,CEBU- Mitubag si Balamban,Cebu Mayor Amos Edwin C. Cabahug sa isyu sa ₱76 milyones nga pondo alang sa ayuda sa mga naapektuhan sa Bagyong Tino, human kini gi-flag sa Commission on Audit (COA) tungod sa kakulang sa mga resibo ug dokumentong gikinahanglan sa pag-liquidate sa pondo.
Sa pakighinabi sa Bombo Newsteam, gipatin-aw ni Cabahug nga gisumite na sa mga hingtungdang departamento ang mga dokumento, apan adunay kakulangan sa ilang pagsumite.
Gipasiugda usab sa mayor nga andam siyang motubag sa mga pangutana sa COA kalabot sa pagdumala sa maong pondo.
Mahitungod sa mga donasyon panahon sa bagyo, matod ni Cabahug, iyang gipaagi sa Municipal Treasury ang mga tabang gikan sa mga pribadong indibidwal, lakip ang iyang mga higala ug kanhing mga klasmeyt.
Gipasiugda usab niya nga iyang gipaagi sa Department of Social Welfare and Development (DSWD) ang pagproseso sa mga donasyon aron mahatag kini sa mga nanginahanglan.
Dugang pa sa mayor, ang iyang tumong mao ang pagtabang sa mga residente nga naapektuhan sa kalamidad.
Gihangyo usab niya ang publiko nga susihon una ang mga impormasyon sa dili pa magpagawas og mga pahayag nga posibleng magamit sa politika.
Sa pagkakaron, gikinahanglan ang pagkompleto sa mga resibo ug uban pang dokumento nga gipangayo sa COA aron mapamatud-an ang hustong paggamit ug pag-apod-apod sa maong pondo.
