PROVINCE OF CEBU- Aktibo ang Balamban Municipal Jail sa mga Programa alang sa Rehabilitasyon sa mga Persons Deprived of Liberty (PDLs), kung diin prayoridad ang ilahang kaluwasan ug ang ang kalamboan.
Kini ang klaro ug hugot nga pamahayag ni JSINSP Rie James L. Pepito, ang Municipal Jail Warden sa Balamban Municipal Jail, atol sa eksklusibong pakighinabi sa Bombo News Team.
Sumala ni Warden Pepito, dili lang seguridad ang ilang gihatagan ug dakong pagtagad sa prisohan, apan lakip na usab ang kahimsog ug kaugmaon sa mga Persons Deprived of Liberty (PDLs) nga ilang ginadumala.
Lakip sa mga gi-prioritize sa iyang administrasyon mao ang edukasyon.
Gipasabot ni Pepito nga sukad sa iyang paglingkod isip warden, daghan na sa ilang mga PDLs ang nakahuman sa elementarya, sekondarya, ug Senior High School pinaagi sa Alternative Learning System (ALS) nga gisuportahan sa DepEd.
Apil usab sa ilang gipaningkamotan ang skills training aron andam ang mga PDLs sa ilang pagbalik sa komunidad. Pinaagi sa TESDA, gihatagan sila og higayon nga makakuha og National Certificate II (NC II) nga magamit nila sa pagpanginabuhi sa gawas sa prisohan.
Dili lang edukasyon ug trabaho ang gitutukan — kundili apil usab ang pagdasig sa mental health ug social interaction sa mga PDLs.
Sa bag-ohay lang nga Nutrition Month celebration, gi-highlight sa prisohan ang usa ka makalingaw ug edukatibong aktibidad nga gitawag “Dress as Your Favorite Fruit,” diin nagpakita og pagka-creative ug kalipay ang mga PDLs sa ilang pag-apil. Ang maong kalihokan nakakuha pa og atensyon sa social media tungod sa kakulbahinam ug positibong mensahe nga gipaabot niini.
Samtang naglingaw-lingaw ang mga PDLs, nakita sa publiko nga lahi ra ang tinuod nga kahimtang sulod sa prisohan kumpara sa mga salida. Apan giklaro ni Pepito nga dili kini pasabot nga ginapromote niya ang pagsulod sa prisohan.
Nanawagan si JSINSP Pepito sa katawhan nga ihatag ang ikaduhang kahigayunan sa mga PDLs. Bisan pa sa ilang mga nahimo nga kasaypanan, angayan pa gihapon silang dawaton ug tagaan og higayon nga makapadayon sa kinabuhi.
Pahimangno ni Pepito, trabaho sa kumunidad ang pagdawat sa mga nagbag-ong PDLs – dili lang para sa ilang kaugalingon, kundi para sa kalinaw ug kalamboan sa katilingban.
