Kusganong gikondenar sa Pilipinas ang bag-o lang nga paglusad sa North Korea og mga ballistic missiles.
Hinungdan nga nanawagan ang PH sa North Korea nga hunongon dayon ang gikataho nga ballistic missile launch ug gipahinumdoman kini nga tumanon ang tanan nga international obligations lakip na ang UN Security Council Resolutions ug mopasalig sa malinawon ug constructive dialogue.
Sa usa ka pahayag, ang Department of Foreign Affairs (DFA) miingon nga ang maong mga provocative nga mga aksyon makadaut sa pag-uswag, kalinaw, ug kalig-on sa Korean Peninsula ug sa Indo-Pacific nga rehiyon.
Gitaho usab sa militar sa South Korea nga ang North Korea naglunsad og daghang mga short-range ballistic missiles sa silangang baybayon, nga posible aron sulayan ang performance ug kalig-on sa mga projectiles alang sa eksport.
Matod sa SoKor, ang mga missile gilusad gikan sa Wonsan, usa ka silangang baybayon nga siyudad sa North Korea niadtong Mayo 8 ug milupad kini hangtod sa 800 kilometers sa wala pa mahulog sa dagat.
