CEBU CITY- Gimando dayon ang pagsuspenso sa klase og trabaho sa pipila ka mga tunghaan, ahensya sa gobyerno, ug mga pribadong kumpanya mugna sa kadaot sa 5.4 magnitude nga linog nga miigo sa tibuok lalawigan sa Sugbo ug mga kasikbit nga mga probinsya sa Kabisay-an.
Sa pakighinabi sa Bombo Radyo Cebu News Team kang Cebu City Councilor Dave Tumulak, ang chairman sa Cebu City Disaster Risk Reduction and Management Council (CCDRRMC), nga bisan pa man og nabati ang linog sa dakong bahin sa Sugbo, apan maayo nalang nga walay gitaho nga dakong kadaot sa syudad gawas nalang sa usa ka haligi sa usa ka building sulod sa kampo sa kapulisan sa dakbayan nga buhatan sa Highway Patrol Group diin dali dayon nila kining gi-aksyonan.
Bisan pa, ang mga emergency response team ug mga kabumberohan kay daling gi-deploy sa mga pampublikong lugar ilabi na sa mga tambalanan alang sa dali nga pagresponde.
Ingon man nga padayon ang hugot nga pagmonitor sa ilang Earthquake Intensity Meters ang mga lokal nga panggamhanan ug nagpahinumdom sa publiko nga magpabiling alerto kay adunay gilauman nga mga aftershock nga ma-record sa musunod nga mga oras.
