Gianunsyo sa Commission on Elections (COMELEC) nga ang Bangsamoro Parliamentary Elections sa Oktubre padayunon kini ug nagpadayon pa ang pagpangandam niini.
Gitubag ni COMELEC Chairman George Erwin Garcia ang mga huhungihong nga posibleng ma-postpone ang piniliay sa BARMM. Apan, gikabuyag niya nga andam na ang poll body alang karong eleksyon.
Kahinomdoman nga una nang nanawagan si Garcia kang Bangsamoro Chief Minister Abdulraof Macacua, nga modesisyon sa relocation sa pito ka mga puwesto nga orihinal nga gigahin sa Sulu. Kini human gibasura sa Sulu ang Bangsamoro Organic Law sa 2019 plebisito.
Ang poll body nibutang og deadline sa ikaduhang semana sa Hunyo alang sa desisyon ug niingon nga kon wala gihapon silay makuha, ipadayon nila ang pagpangandam sa 73 ka mga puwesto.
Gipasaligan usab niya ang publiko nga ilang tumanon ang Bangsamoro Election Code atol sa ilang pakigtagbo kang Bangsamoro Education Minister Mohagher Iqbal.
Gihisgutan usab nila ni Iqbal ang gisugyot nga plebisito alang sa pagbahin sa Datu Odin Sinsuat sa Maguindanao del Norte ngadto sa tulo ka mga siyudad, ug giingon nga mahimo kining iapil sa balota sa eleksyon.
Ang pamahayag ni Garcia nunot usab sa baruganan ni BARMM Chief Minister Abdulraof Macacua nga iyang gisuportahan ang panawagan nga ipadayon ang eleksiyon karong Oktubre 13, subay sa schedule sa BARMM Parliamentary Elections.
Ang election period magsugod sa Agosto 14 hangtod Oktubre 18, samtang ang campaign period gikan sa Agosto 28 hangtod Oktubre 11. | via Bombo Irene Ardiente
