Bar sa Ecuador, gipusil: 9, patay

Patay ang 9 ka mga indibidwal human gipusil samtang nagduwa sa usa ka bar sa Ecuador.

Matod sa mga otoridad, kalit nga nisulod ang mga armadong suspek sa bar diin nagduwa og pool ang mga biktima sa General Villamil Playas sa probinsya sa Guayas.

Matud ni Police Colonel Jhanon Varela nga duha ka mga biktima ang naangol sa maong insidente ug daling gidala sa tambalanan.

Matod pa, kini ang usa sa pinakamadugo nga krimen sa naasoyng nasud, diin sa unang lima ka bulan lamang sa 2025, ang mga awtoridad nakatala na og 4,051 ka kaso sa pagpatay.

Sa kasamtangan, nagpadayon ang imbestigasyon sa mga otoridad sa maong insidente sa pagpamusil.