Gihagit ni House impeachment adviser ug spokesman Ace Barbers ang legal team ni Bise Presidente Sara Duterte nga direktang tubagon ang mga dokumento ug rekord sa panalapi nga gipresentar sa prosekusyon atol sa impeachment trial.
Matod ni kanhi Representante Barbers, ang kamatuoran dili masukod pinaagi sa gidaghanon sa mga saksi, gitas-on sa mga argumento, o mga pagsupak sa pamaagi sa husay, kondili pinaagi sa katakos sa depensa sa pagpasabot sa mga numero nga anaa sulod sa mga dokumento.
Sa partikular, nangayo ang prosekusyon og katin-awan kung ang mga kabtangan ug obligasyon nga gideklarar sa Bise Presidente diha sa iyang Statement of Assets, Liabilities, and Net Worth (SALN) nagtugma ba, ug kung ang iyang gideklarar nga kita igo ba aron ipasabot ang iyang natigom nga mga kabtangan.
Gipasiugda ni Barbers nga kung ang mga transaksyon tinuod ug husto, ang matag numero kinahanglan nga mapatin-aw pinaagi sa klaro nga katarungan ug mga ebidensya nga mosuporta niini.
Dugang pa niya nga ang politika ug pagkamaunongon sa partido dili angay maghari sa maong proseso, ug nga ang mga senador-judges kinahanglan motimbang sa mga ebidensya sa patas nga paagi ug subay sa Konstitusyon.
