Gipanghimakak ni Cebu Governor Pamela Baricuatro, ang mga pasangil nga mikatap online nga misulay siya sa pag-impluwensya sa mga magbabalaod sa Sugbo batok sa pagsuporta sa impeachment ni Bise Presidente Sara Duterte.
Ang isyu naggikan sa usa ka post sa social media nga gihimo niadtong Mayo 8 sa Filipino content creator nga nakabase sa Netherlands nga nailhan sa iyang lig-on nga suporta sa pamilyang Duterte.
Sa maong post, ang vlogger nag-alegar nga si Baricuatro giingung nakigkontak sa mga kongresista human giingong gibadlong sa Malacañang tungod sa pag-recruit og mga boto batok sa bise presidente.
Ang pasangil nakaaghat og tubag sa publiko gikan sa consultant sa panglawas sa Kapitolyo sa Sugbo nga si Dr. Elisse Nicole Catalan, anak ni Baricuatro, kinsa kusganong mihimakak sa pasangil ug nanalipod sa gobernador gikan sa iyang gihulagway nga “sayop nga mga naratibo.”
Si Catalan mibutyag nga ang gobernador nagpabilin nga naka-focus sa pagdumala ug serbisyo publiko sukad sa paglingkod sa katungdanan, nga gihulagway ang administrasyon sa iyang inahan nga usa nga nagtrabaho “aron pagserbisyo sa tanang mga Cebuano, dili lang usa ka paksyon.”
Gisaway usab niya ang iyang gihulagway nga padayon nga mga pag-atake sa online batok sa gobernador.
Samtang sa pikas bahin, si Baricuatro hugot nga mihimakak sa bisan unsang pasangil nga maimpluwensyahan ang mga magbabalaod sa Sugbo bahin sa isyu sa impeachment nga naglambigit kang Duterte.
Gihagit usab ni Baricuatro ang bisan kinsang magbabalaod sa Sugbo nga nagtuo nga misulay siya sa pag-impluwensya sa ilang posisyon nga mopadayag sa publiko o makigsulti pinaagi sa mga opisyal nga channel.
