PROVINCE OF CEBU- Pormal nga gi-inagurahan si Pamela “Pam” Baricuatro isip bag-ong Gobernador sa Probinsiya sa Sugbo karong adlawa, Hunyo 30, 2025, sa kapitolyo samtang ang outgoing gobernador nga si Gwendolyn Garcia wala mi patim-aw sa maong kalihukan.
Sa iyang inaugural nga pamahayag, miingon si Baricuatro nga prioridad niya ang tinuoray nga serbisyo, pagka-abli sa impormasyon, ug pag-apil sa katawhan sa mga desisyon.
Apan bisan og opisyal na siyang naglingkod, giingon sa iyang kampo nga hangtod karon wala pa makompleto ang pagturn-over sa mga dokumento ug impormasyon nga gikinahanglan sa pagpahigayon sa epektibo nga pagdumala.
Sa miaging semana, gipadayag ni Baricuatro ang iyang kasagmuyo sa kalisod nga ilang nasinati atol sa transition.
Ang Department of the Interior and Local Government (DILG) mitambong sa turnover ug padayon nga naningkamot nga matabangan ang duha ka kampo aron makompleto ang proseso subay sa saktong pamaagi.
Samtang niini usab nga adlaw, gisalikway sa legal nga team ni Baricuatro ang disqualification case batok kaniya, nga ilang giingong “bakak ug lapas na sa oras.”
Misalig ang ilang kampo nga kini nga kaso walay epekto sa iyang pagkadaug.
Nag-atang karon ang Subuanon kon unsaon sa bag-ong gobernadora pagdaug sa mga hagit sa iyang unang mga adlaw ug kon matuman ba gayud niya ang iyang mga saad sa kampanya.
