CENTRAL VISAYAS-Gipakusgan sa Police Regional Office (PRO 7) ang ilahang information drive sa crime prevention awareness ug extended services ngadto sa labing menos 100 ka mga sakop sa Muslim Salaam Police Advisory Group, Muslim youth and elders, ug leaders nga gipahigayon sa Barangay Basak, Lapu-Lapu City, Cebu.
Pinaagi sa hini-usang paningkamot sa nagkadaiyang advocacy support groups ug force multipliers niini, ang Project: “SALAAM” (Serbisyo Alang sa mga Kaigsuonang Lumad na Aktibo ug Alyadong Muslim) natuman arun sa pagpalig-on ug pagpalapad sa kahibalo sa komunidad batok sa komunistang terorismo ug pagpugong sa krimen pinaagi sa mga lecture ug symposiums.
Usa kini sa mga halangdon nga proyekto nga gilusad subay sa National Task Force to End Local Communist Armed Conflict sa Central Visayas nga nakatabang na sa pipila ka mga sakop sa komunidad.
Dugang pa, ang PRO 7 nagtanyag og uban pang serbisyo sa mga benepisyaryo nga naglakip sa libre nga medical check-up, libre nga tupi, pagproseso sa national ID, police clearance assistance, legal consultation, ug pagpang-apod-apod og mga relief goods, hygiene kits ug bitamina.
Samtang, ang Regional Director, Police Brigadier General Anthony Aberin, nga gi-presentar ni Police Colonel Noel Flores, ang deputy regional director for operations, mipaabot sa iyahang pasalamat sa Muslim Community sa dakbayan sa Lapu-Lapu City, pinangulohan ni Imam Abdurrahim Lopez, Salaam Advocacy Group President, sa ilahang madasigon nga pagsalmot sa mga aktibidad nga gipasi-ugdahan sa PRO 7 ug sa pakig-alayon sa City Director nga si Police Colonel Elmer Lim.
