CEBU CITY-Ipahigayon sa kagamhanang dakbayan sa Sugbo ang bidding niini sa pagtrabaho sa Cebu City Medical Center (CCMC) karong hinapos sa buwan sa Disyembre 2024.
Kini ang gipahibaw ni Cebu City Mayor Raymond Alvin Garcia kagahapon adlawa sa Lunes, Disyembre 9 diin para kini sa paghitsas sa ikaupat ngadto na sa ikaunom nga andana sa naasoy nga tambalanan.
Matod sa opisyal nga ignig human sa bidding process kay ipahigayon dayon ang pag-award sa proyekto sa konstruksyon diin muabot sa P700-milyones ang pundo nga gigahin sa kagamhanan sa dakbayan.
Dugang ni Mayor Garcia nga ang labing dali nga paagi mao nga magpahimo na og Program of Works and Estimate (POWE), diin adto kuhaon ang pundo sa trust fund nga account hain asa gi-donate ang kwarta alang sa proyekto kun itandi sa sugto ni City Councilor Mary Ann de los Santos nga Private-Public Partnership (PPP) tungod kay ipaagi pa sa kaulohan ang proseso niini nga makapalangay sa konstruksyon.
Subli niyang giawhag niya kadtong buot mohatag og donasyon sa CCMC nga idiretso og hatag ang donasyon sa Cebu City Treasurer’s Office ug dili ipaagi og third party sama sa nahitabo karon nga adto gipaagi sa Cebu Medical Society sa “Piso mo, Hospital ko” niadtong nakalabayng katuigan.
