Masaligon ang Bureau of Internal Revenue (BIR) nga ang gitawag nga “BGC Boys” makombikto human ang Department of Justice (DOJ) nagrekomendar sa pagpasaka og 44 ka kasong kriminal tungod sa giingong total tax liabilities nga P1.68 bilyon.
Ang tulo ka kanhing mga Department of Public Works and Highways (DPWH)–Bulacan engineer, sila si Henry Alcantara, Brice Hernandez, ug Jaypee Mendoza, ang mag-atubang og 44 ka kaso sa tax evasion tungod sa giingong total tax liabilities nga P1.68 bilyon.
Sumala sa BIR, adunay dakong kalainan tali sa ilang gideklarar nga kita ug sa ilang mga kabtangan ug mga nagasto.
Giingon usab sa ahensya nga ang uban kanila giingong wala mag-file og income tax returns sulod sa pipila ka tuig.
Ang mga girekomendang kaso naglakip sa 18 ka kaso batok kang Alcantara nga adunay kapin sa P913 milyon nga giingong tax liability, 10 ka kaso batok kang Hernandez nga adunay kapin sa P593 milyon, ug 16 ka kaso batok kang Mendoza nga adunay kapin sa P179 milyon.
Samtang, sila si Hernandez ug Mendoza kasamtangang gitanggong tungod sa laing kaso nga naglambigit sa giingong P92.8 milyon nga “ghost” flood control project sa Bulacan.
Si Alcantara natangtang isip respondent sa maong kaso human siya mitestigo ug gibutang sa Witness Protection Program.
