Nalabwan sa Bureau of Internal Revenue (BIR) ang target tax collection niini sa unang upat ka bulan sa kasamtangang tuig.
Basi sa opisyal nga report sa ahensya, nakakolekta kini og sobra sa P1.155 trilyon nga buhis gikan sa Enero hangtod Abril karong tuiga.
Diin kini P9.6 bilyon nga mas taas kaysa sa target nga koleksyon sa ahensya alang sa nahisgutang panahon.
Sumala ni BIR chief, Charlito Martin Mendoza, kini resulta sa gipalapdan ug gipauswag nga mga reporma sa digitalization, audit system, ug mga serbisyo sa magbubuhis, sama sa paglusad sa BIR sa usa ka digital tax calendar, online taxpayer portal, ug gipasimple nga proseso sa pagparehistro sa negosyo.
Kini kabahin sa paningkamot sa modernisasyon sa gobyerno ug sa bukas nga pagkolekta sa buhis sa tibuok nasud.
Ang ahensya naglaum nga ang pagkolekta sa buhis magpadayon sa pagdaghan sa tibuok tuig, uban sa kooperasyon sa mga Pilipino alang sa tukma sa panahon ug husto nga pagbayad sa buhis.
