PROVINCE OF BOHOL- Gikinahanglan nga makabaton og kaugalingong power generation capacity ang Bohol aron matubag ang nagkadakong panginahanglan sa kuryente sa probinsya ug maminusan ang pagsalig niini sa suplay gikan sa ubang lugar sa Visayas.
Kini ang punto ni Nathaniel Chua, convenor sa Cebu Electricity Rights Advocates o CERA, samtang iyang gihisgutan ang padayong kakulang sa power supply sa Visayas.
Matud ni Chua, samtang limitado ang suplay sa kuryente sa rehiyon, posible nga magpadayon ang rotational brownout aron malikayan ang mas dugay nga power interruption sa usa ka lugar.
Iyang gipasidaan nga kinahanglan mapaspasan ang pagtukod sa mga power plant, lakip ang mga baseload power plant, sa mga lugar sama sa Bohol ug Negros aron madugangan ang lokal nga power supply.
Sumala ni Chua, kung adunay igo nga kaugalingong power generation ang Bohol, makatabang kini sa pagkunhod sa pressure sa transmission system ug sa pag-atubang sa power shortage sa Visayas.
Gibutyag usab niya nga ang dugay nga solusyon sa problema mao ang pagdugang sa power supply ug local generation capacity, imbis magsalig lamang sa mga temporaryong lakang aron matubag ang kakulang sa kuryente.
