Gipadayag ni Nathaniel Chua, ang convenor sa Cebu Electricity Rights Advocates, ang iyang dakong kabalak-an bahin sa nagpadayong mga rotational brownout ug pagsige og kapawong sa kuryente sa nagkalainlaing dapit sa Sugbo.
Sumala pa niya atol sa pakighinabi sa Bombo Radyo Cebu, ang kasamtangang kahimtang diin ang pipila ka lugar nakasinati og brownout nga moabot sa usa hangtod tatlong ka oras, ug gani sa uban moabot pa sa tulo hangtod unom ka oras, usa ka klarong senyales nga nipis o nihit na kaayo ang supply sa kuryente sa rehiyon.
Gipasabot ni Chua nga kaniadto, wala kaayo mabati ang kanihit sa supply tungod kay abunda man ang kuryente nga gikan sa Mindanao ug sa mga kasilinganang rehiyon sama sa Leyte pinaagi sa ilang geothermal power plants.
Tungod sa sobra nga kuryente gikan niining mga dapita, nasuplay niini ang mga panginahanglan sa Sugbo. Apan, sa pagkakaron, ang sobra nga kuryente gikan sa Mindanao mikunhod o nagkagamay na, samtang ang konsumo ug panginahanglan sa kuryente sa Sugbo nagpadayon sa pagsaka.
Dugang niya nga kaniadto, ang Yellow Alert igo na aron magpasidaan, apan karon dali ra kining mosaka ngadto sa Red Alert. Imbis nga ang pagkawala sa kuryente molungtad lang og pipila ka minuto, kini molungtad na og pipila ka oras. Nagpasidaan si Chua nga kon dili dayon masulbad kining krisis sa suplay, modaghan pa ang kasubsob ug gidugayon sa pagkawala sa kuryente sa umaabot nga mga adlaw.
Gibutyag usab ni Chua, nga ang mga nag-unang rason sa natad sa kuryente kun ngano nga nakaeksperyensya og Red Alert ang Visayas ug Mindanao. Sumala pa niya, paspas nga nagkahitabo ang pagtaas sa demand sa kuryente taliwala sa grabeng kainit sa panahon, pagdaghan sa mga electric vehicles (EVs), ug ang pagtubo sa mga negosyo sa Sugbo, hinungdan nga wala na makaapas ang kasamtangang supply.
Dugang niya nga dili lang kini isyu sa kakulang sa pagmugna og kuryente apan lakip na niini ang pagsalig sa imported nga kuryente gikan sa Mindanao, diin kon maglisod ang suplay sa Mindanao, natural nga maapektuhan usab ang Visayas tungod kay giuna sa Mindanao ang pagsuplay sa kaugalingong mga konsumidor.
Gihatagan usab ni Chua og gibug-aton ang problema sa mga daan nga linya sa transmisyon ug mga kable nga dili na makadala sa gikinahanglan nga kapasidad karon, nga iyang gitandi sa usa ka daan nga tubo sa tubig nga daghang mga buslot ug mikunhod ang presyur, dugang pa sa mga proyekto sa linya sa transmisyon nga nalangan ug wala nahuman sa oras.
Tungod niini, nanawagan ang CERA sa mga hingtungdang ahensya nga pauswagon, bag-uhon, ug paspasan ang pag-upgrade sa mga linya sa transmission ug mga pasilidad aron masiguro ang kasaligan ug malungtarong suplay sa kuryente para sa tanan.
