BOHOL-Gideklarar nga dengue outbreak ang tibuok lalawigan sa Bohol human miabot sa kapin 5,800 ang natalang mga kaso sa dengue gikan sa Enero hangtud sa Agosto 24 ning tuiga.
Diin ang Bohol naglumba sa pagkontrolar sa pagdagsang sa dengue ug mahimong modeklarar og state of calamity samtang mosaka ang mga kaso basi sa cumulative data karong tuiga.
Gani, adunay kasabutan niadtong Agosto 29, nga ang Provincial Anti-Dengue Task Force nirekomendar pinaagi sa usa ka resolusyon kang Gobernador Erico Aristotle Aumentado sa pagdeklarar ug dengue outbreak sa probinsiya.
Kini mao’y gikataho sa tigom sa task force niadtong Lunes, Septiyembre 2, nga nikabat sa 5,839 ka kaso sa dengue gikan sa Enero ning tuiga hangtod sa Agosto 24 ang nata;a ug 14 niini ang gikatahong namatay.
Samtang sa kasamtangang record mas taas og 451.4% kumpara sa samang panahon sa miaging tuig, nga adunay 971 lamang ka kaso, busa milabaw sa epidemiological threshold nga gitaho sa Provincial Epidemiological Surveillance Unit (Pesu).
Basi sa report sa Pesu, 24 ka lungsod sa probinsiya ang kwalipikado na nga modeklarar sa outbreak, samtang pipila ka lungsod ang potential outbreaks.
Ang datos gipaluyohan usab sa taho sa Regional Epidemiological Surveillance Unit uban sa hiniusang datos sa Bohol, diin ang epidemiological threshold milapas na sa miaging 6 ka semana sa pagkasakit.
Naglangkob kini sa 8 nga namatay nga natala kaniadtong Agosto diin 3 sa Tagbilaran City, 2 sa Inabanga, ug 1 matag usa sa Anda, Getafe, ug Ubay.
Dugang pa, gipasalig ni Aumentado nga ang Panggamhanan sa Probinsiya, pinaagi sa Provincial Health Office, mihimo og mga gikinahanglang aksyon aron masumpo ang nagkataas nga kaso sa dengue.
Sa umaabot nga deklarasyon sa dengue outbreak, ang mga local government units gilauman nga mopatuman og mga lakang, lakip na ang gipausbaw nga 4S Strategy, reactivation sa ilang local task force ug Aksyon Barangay Kontra Dengue, ug pakigtambayayong sa nagkalain-laing stakeholders.
Laing gipaabot nga mga lakang mao ang pagpangita ug pagguba sa mga lugar nga breeding sa lamok, dengue fast lanes sa mga health units ug mga ospital, tukma nga referral sa mga pasyente, alokasyon sa pondo alang sa mga suplay alang sa dengue prevention, ug pagtukod sa mga local operations centers.
