Nagpagawas na ang Korte Suprema og show cause order batok kang Quezon City 4th District Representative Bong Suntay ug Atty. Ferdinand Topacio tungod sa ilang giingong malaw-ay nga mga pamahayag bahin kang Anne Curtis-Smith ug sa iyang igsoon nga si Jasmine Curtis-Smith.
Gimandoan sa Korte Suprema sila si Suntay ug Topacio nga mopasabot nganong dili sila angay tangtangon sa serbisyo.
Mahinumduman nga ang pamahayag ni Suntay niadtong Marso 3, 2026, samtang naghatag sa iyang testimonya sa House Committee on Justice hearing sa impeachment complaint batok kang Bise Presidente Sara Duterte, kontrobersyal.
Samtang, ang mga pamahayag ni Topacio sa iyang programa sa radyo niadtong Marso 5, 2026, nakakuha usab og kritisismo human niya gihisgutan ang isyu sa pamahayag ni Suntay ug nahisgotan ang managsuong Anne ug Jasmine Curtis-Smith.
“Kayong mga artista, mga ganyan, ikaw, Jasmine, bakit ka nagpo-post ng bikini pictures mo sa social media, sa mga pahayagan—hindi ba para ikaw ay pagnasahan, para ikaw ay sumikat?” matod ni Topacio.
Subay sa resolusyon sa Korte Suprema, sila si Suntay ug Topacio adunay 10 ka adlaw gikan sa petsa sa pagdawat sa mando aron isumite ang ilang mga komento.
Gimandoan usab sa Korte Suprema ang Office of the Bar Confidant nga magsumite og updated nga lista sa mga pending nga administratibong kaso batok kang Suntay ug Topacio.
Gimandoan usab ang Integrated Bar of the Philippines (IBP) nga maghatag og status report bahin niini.
Hangtod karon, wala pa’y gipagawas nga pahayag o tubag sila si Suntay ug Topacio bahin sa mando sa Korte Suprema.
