Giinsister sa beteranong abogado nga si Atty. Ferdinand Topacio nga kinahanglan motuman ang Estados Unidos sa mga balaod sa Pilipinas bahin sa hangyo niini nga i-extradite si Pastor Apollo Quiboloy, ang founder sa relihiyosong organisasyon nga Kingdom of Jesus Christ.
Kini human pormal nga gihangyo sa gobyerno sa Estados Unidos ang Pilipinas alang sa extradition ni Quiboloy, nga kasamtangang anaa sa kustodiya sa mga awtoridad.
Sumala ni Topacio, ang proseso sa extradition nagpabiling sakop sa lokal nga mga korte, ilabina sa paghisgot ug pagsusi sa mga merito sa maong hangyo.
Matud pa niya, kinahanglan gihapon nga sundon ang maong proseso bisan pa og adunay extradition treaty tali sa Pilipinas ug Estados Unidos.
Niadtong Agosto 6, gikumpirma sa Department of Foreign Affairs (DFA) nga pormal nang gihangyo sa Estados Unidos ang extradition ni Quiboloy aron atubangon ang mga kasong kriminal nga giatubang niya sa maong nasud.
Ang extradition request miabot hapit duha ka tuig human nadakpan si Quiboloy sa Mindanao niadtong Septyembre 2024.
