CEBU CITY — Nipagawas og bag-ong kamanduan si Cebu City Mayor Edgardo Labella arun malikayan ang subling pagsaka sa kaso sa COVID-19 sa dakbayan.
Mi-anunsyo si Mayor Labella pinaagi sa social media nga pahugtan og balik ang border control sa syudad sa adlaw nga Lunes, Nobyembre 16, sa alas-5:01 sa buntag.
Matud niini nga dili kini gustong ibalik sa Enhanced Community Quarantine (EQC) ang syudad sanglit anaa pa sa palibot ang makamatay nga kagaw.
Hangyo niini sa tanang mga sugboanun nga mosunod ug mokooperar sa City Government.
Makasulod-gawas sa dakbayan ang mga adunay “legitimate concerns, mga nagpuyo ug nagtrabaho sa Cebu City, ug kadtong mga Authorized Persons Outside Residence (APOR).
Samtang ibalik usab ang coding scheme sa mga quarantine pass aron kalikayan ang paggawas-gawas sa mga tawo kung dili mahinungdanon ang tuyo.
Gikatakdang mopagawas og bag-ong executive order ang mayor arun nga mapatuman ang maong direktiba.
Gitahasan usab niini ang mga barangay kapitan ug mga opisyales nga strikto kini nga ipatuman ilabi na ang mga health protocols sa ilang mga konstiwente.
Hangyo karon ni Labella sa mga Sugbuanon nga mosanong sa mga minimum health and safety protocols, sama lang sa pagsul-ob og facemask, face shield, ug pagdistansya sa usa’g usa, aron dili matakdan sa makamatay nga kagaw.
