CEBU CITY – Mihimo ug public apology ang nag-trending sa social media nga Jason John Tapales a.k.a “Boy Laway” human kini nga namahid ug pintal nga adunay laway sa nawong sa magti-ayong Arcilla niadtong nakalabay nga Sinulog 2020.
Gipasabot ni Tapales nga ang iyahang higala nga babaye ang nagkuha ingon man nga nag-upload sa maong video ug natingala na lang kini sa dihang nag-viral sa social media.
Matud pa ni Boy Laway nga gimahayan niini ang iyahang gibuhat ug giingong nadala lang kini sa kalingaw sa palibot sa Mango Avenue.
Giingong gumikan sa tumang kaulaw nga iyahang gibati hinungdan nga midesisyon kini nga mag-deactivate sa Facebook.
Gawas sa magti-ayong Arcilla, nangayo usab ug pasaylo si Tapales sa mga konstituwente sa dakbayan sa Sugbo subay sa gibuhat niini nga paghinugawan taliwa sa relihiyoso nga aktibidad.
Subay niini, nanghinaut kini nga dili na mupasaka ug kaso ang mga Arcilla kaniya ingon man sa mga opisyal sa Cebu City.
Mihangyo usab si Tapales ngadto kang Cebu City Police Office Director Police Colonel Engelbert Soriano nga dili na kini ideklarar nga ‘persona non grata’ sa dakbayan sa Sugbo.
Nahitabo ang pagpangayo ug pasaylo ni alyas Boy Laway atubangan sa mga sakop sa tigbalita sa opisina ni Cebu City Councilor Joel Garganera.
