ALCOY,CEBU- Nabalhog nasab sa prisohan ang Cebuano vlogger nga si Ronie Suan o mas nailhan nga si Boy Tapang.
Apan, karon dili na siya nag-inusra gumikan aduna siyay kuyog nga laing nailhan usab nga Tapang, kaubang vlogger niini nga si JV Tapang.
Kini ang gikumpirmar ni Police Capt. Gerry Magsayo, ang OIC-PNP Chief sa Alcoy MPS atol sa pakighinabi sa Bombo News Team nga gipadala sa ilang buhatan ang warrant of arrest niini gikan sa Antipolo City Branch 99.
Matud ni Magsayo nga ang mga kasong nakalatid sa warrant ni Boy Tapang kay mao ang kalapasan sa section 4 in relation to section 6 article 2 of RA 10175, in relation usab sa article 353 ug 355 sa revised penal code o sa kasong cyber libel nga adunay piyansa nga P10,000 matag usa kanila alang sa ilang temporaryong kagawasan.
Dugang pa sa opsiyal nga ang isang-at sa maong kaso batok kang Boy Tapang kay ang kanhi uyab niini.
Karong adlawa, iproseso usab ang iyang pagpagawas hinungdan nga nabuntagan nasab kini sa prisohan.
Subay niini, mihatag og pahimangno ang opisyal hilabi na ngadto sa mga content creator nga magmatngon ug magbinantayon sa pag-post sa social media.
Kini aron dili makalapas sa balaod ug makatamak pa og laing tawo.
