Gianunsyo sa Brazil nga gihuman na niini ang mga dokumento aron opisyal nga moapil sa kaso sa South Africa batok sa Israel sa International Court of Justice (ICJ) tungod sa giingong genocide sa Gaza.
Ang kaso, nga gisang-at sa South Africa niadtong 2023, nag-akusar sa Israel sa paglapas sa 1948 Genocide Convention tungod sa mga pag-atake niini sa mga sibilyan sa Gaza taliwala sa gubat batok sa grupong Hamas.
Sumala sa reklamo, giingong gipuntirya sa Israel dili lamang ang Hamas kondili ang mga eskwelahan, ospital, kampo, ug mga puy-anan.
Ingon man nga daghang mga nasud usab ang niapil sa kaso sama sa Spain, Turkey, ug Colombia.
Sa usa ka pahayag, gikondenar sa Brazil ang mga paglapas sa internasyonal nga balaod nga giingong nahimo sa Israel, lakip ang pinugos nga pagsakop sa mga teritoryo.
Gidugang niini ang lawom nga kasuko sa kapintasan nga giantos sa mga sibilyan.
Kusganonng gipanghimakak sa Israel ang mga akusasyon ug miinsistir nga ang bugtong katuyoan niini mao ang pag-atake sa Hamas, ingon man nga gitawag sa mga abogado sa Israel ang kaso sa South Africa nga usa ka sayop nga paggamit sa genocide convention.
Samtang, gisaway usab sa embahada sa Israel sa Brasilia ang pahayag sa Brazil, nga nag-ingon nga wala kini hingpit nga naghulagway sa tinuod nga sitwasyon sa Gaza ug gisalikway usab niini ang papel sa Hamas.
Hinungdan nga gikondenar sa Brazilian National Israeli association (CONIB) ang desisyon, nga nagtawag niini nga “The breaking of Brazil’s long-standing friendship and partnership” tali sa Brazil ug Israel.
