CEBU CITY-Mihangyo si Cebu City Councilor Dave Tumulak, ang chairman sa Committee on Public Order and Safety atol sa gipahigayon nga meeting sa Kapisanan ng mga Brodkaster ng Pilipinas (KBP) kabahin sa disaster preparedness nga magbuhat ug mga radio plugging kabahin sa mga angay buhaton sa mga katalagman aron nga masayod ang katawhan.
Radio plugging kini nga masabtan gyud matud pa sa mga katawhan gumikan kay adunay mga sitwasyon o reports nga dili makasabot ang mga tao kung unsa ang buot pasabot susama nalang sa mga storm signal, active fault ug uban pa.
Kini subay na sa mga sunod-sunod nga katalagman nga nasinati sa nasud sa kasamtangan. Importante usab matud pa ang paghibaw sa mga angayan nga buhaton ug maghisgot na og katalagman sa pagpangandam aron maminosan ang kadaot nga mamugna.
Lakip sa mga gusto mahitabo ni Tumulak ang pagbutang ug Brgy. Hazard Map kung diin maghatag og impormasyon ang media sa kasayuran og asa ang mga partikular nga baranggay ang lonopunon ingon man mga duol nga police station, health center ug uban pa nga ilang kaduolan.
Apan gihimugatan usab sa konsehal nga importante gayud pud usab ang pag-train sa kaugalingon sa mga sama niini nga mga panghitabo. (Lahvi Quiñones)
