Mipasaka og plea nga “not guilty” si Brice Hernandez, usa ka opisyal sa DPWH-Bulacan First District, uban sa unom ka uban pang akusado, atubangan sa Sandiganbayan Fourth Division kalabot sa kasong graft nga naglambigit usab sa kanhing Ako Bicol Representative nga si Zaldy Co, nga giila sa mga awtoridad nga pugante.
Kauban ni Hernandez sa maong deklarasyon ang mga gitangtang nga kawani sa Department of Public Works and Highways o DPWH nga sila si Jaypee Mendoza, Arjay Domasig, Niño Lawrence Morales, Juanito Mendoza, Floralyn Simbulan, ug Christina Mae Pineda.
Ang mga akusado nalambigit sa flood control projects sa Balagtas, Bulacan nga gituohang adunay mga iregularidad ug nagkantidad og P77 milyon.
Samtang, gihatagan sa korte og 10 ka adlaw ang upat sa mga opisyal aron ipasabot nganong dili sila angay nga suspindihon.
Gawas sa kasong graft, ang mga akusado nag-atubang usab og ubang mga kaso sa nagkalain-laing dibisyon sa Sandiganbayan.
