Naapektuhan ang kapin sa 8.4 milyon ka tawo tungod sa Habagat ug mga bagyong Luis, Maymay, ug Neneng.
Sumala sa National Disaster Risk Reduction and Management Council o NDRRMC,anaa kini sa mga 2.4 milyon ka pamilya gikan sa Zamboanga Peninsula, Central Luzon, National Capital Region, Ilocos Region, Cagayan Valley, CALABARZON, MIMAROPA, Cordillera Administrative Region, ug Bicol Region.
Moabot sa 122,500 ka tawo ang anaa karon sa mga evacuation center tungod sa epekto sa dili maayong panahon.
Nakatala usab ang NDRRMC og 32 ka namatay, diin kadaghanan kanila gikan sa Benguet tungod sa mga insidente sa landslide.
Gibanabana usab nga moabot sa P6.16 bilyon ang kadaot sa imprastraktura ug agrikultura.
Samtang, naghatag ang gobyerno og P1.7 bilyon nga kantidad sa ayuda alang sa mga pamilyang naapektuhan sa Habagat ug mga bagyo.
Daghang lugar ang nagdeklara na og state of calamity, lakip ang Benguet, Bataan, Bulacan, Pampanga, Zambales, Rizal, Cavite, Batangas, ug Occidental Mindoro.
