CEBU CITY — Patay ang usa ka British National 69 anyos human sa nahitabong sunog sa Pacific Grand Villas sa Brgy., Marigondon dakbayan sa Lapu-Lapu pasado alas otso kagabie.
Segon sa asawa sa biktima nga human sila nanihapon kagabie, nananghid kini sa iyang bana nga igawas ug ilakaw-lakaw una ang ilang mga iro.
Nasayran nga pila ka minutos ang nakalabay, sa dihang paingon na pauli ang asawa, igo na lang kini nga gipahibalo sa mga silingan nga nasunog na ang ilang panimalay.
Nagdali-dali matod pa ang asawa sa pagsulod sa balay aron ma-rescue ang biktima apan wala na kini matabang gumikan sa kainit ug kabaga sa aso.
Nakita na lang nga nagkulob na ang Briton sa salog nga posibleng naningkamot pa aron unta makagawas.
Gibutyag sa asawa nga makalakaw pa ang biktima. Samtang anaa usab sa lugar si Mayor Junard “Ahong” Chan alang personal nga pagresponde ug paghatag ug tabang sa nasunogan.
Nasayran nga alas 8:05 nadawat sa kabomberuhan ang alarma, nakontrolar ang kayo sa alas 8:15 sa gabie ug hingpit nga na-fire out alas 8:21 sa gabie.
Padayon nga gisubay sa mga bombero ang hinungdan sa pag-ulbo sa kayo. (Bombo Glenda Sabenorio)
