Giduso ni Senate Committee on Finance Chairperson Senador Sherwin Gatchalian ang paglakip sa ‘Build Back Better Fund’ sa ilang gisugyot nga 2026 national budget.
Ang ‘Build Back Better Fund’ bill nagtumong sa paghatag og hinanaling tabang ug suporta sa mga indibidwal ug komunidad nga grabeng naapektuhan sa nangaging mga kalamidad, sama sa kusog nga mga linog ug makadaot nga mga bagyo nga miigo sa nasod.
Matod sa senador, adunay daghang posibleng tinubdan sa pundo aron ma-finance ang ‘Build Back Better Fund,’ lakip niini ang Local Government Support Fund, nga nagtumong sa pagtabang sa mga lokal nga kagamhanan sa ilang mga proyekto ug programa; ang National Disaster Risk Reduction and Management Fund (NDRRMF), nga maoy nag-unang pundo sa gobyerno alang sa pagpangandam, pagtubag, ug pagbangon gikan sa mga katalagman; ug ang contingency fund, nga gigahin alang sa wala damhang mga panghitabo ug panginahanglan.
Dugang pa, si Gatchalian niingon nga posible usab nga makagahin og pundo alang sa ‘Build Back Better Fund’ gikan sa mga alokasyon nga gibalhin gikan sa Department of Public Works and Highways (DPWH).
Gawas sa pagmugna sa ‘Build Back Better Fund’, si Gatchalian aktibo usab nga nagduso sa alokasyon sa mas taas nga pundo alang sa post-disaster rehabilitation.
Partikular nga gitutokan niya ang pagtukod pag-usab sa mga lawak-klasehanan nga nadaot sa katalagman, ang pagpahiuli sa mga heritage sites nga adunay kahulogan sa kultura ug kasaysayan, ug ang paghatag ug permanenteng puy-anan sa mga pamilya nga nawad-an sa ilang mga balay tungod sa mga katalagman..
