Nipagawas og pasidaan ang Philippine Institute of Volcanology and Seismology (PHIVOLCS) nunot sa pagsaka sa mga pagbuga sa abo sa bulkang Kanlaon.
Mibuto kini pasado alas 11:45 sa buntag kagahapong adlawa sa Lunes, Disyembre 23, diin ang itom nga abo migawas gikan sa summit sa bulkan nga inubanan sa weak low-frequency volcanic earthquakes.
Ang pagbuto nakamugna og usa ka dark plume nga gibana-banang Misaka sa 1.2 ka kilometro ang gitas-on, nga napalid sa amihanan-kasadpan sa labyog sa hangin.
Ang padayon nga pagbuga sa abo nagpatunghag mga kabalaka alang sa mga komunidad sa palibot sa bulkan, labi na kadtong nahimutang sa amihanan-kasadpan ug kasadpang bahin kung diin gilauman nga mahulog ang mga abo.
Gipataas sa PHIVOLCS ang alert level 3 (magmatic unrest), nga nagtimaan sa nagkataas nga risgo sa kalit, posibleng mas kusog nga pagbuto nga makahatag ug peligro sa kinabuhi sa duol nga mga lugar.
Gi-awhag ang mga residente sa mga apektadong lugar nga magpabilin sa sulod sa balay aron malikayan ang paghingos/pagginhawa sa abo ug mapanalipdan ang mga sensitibo nga kagamitan.
Gipaalerto usab ang mga awtoridad sa civil aviation, nga nagtambag sa mga piloto nga likayan ang paglupad duol sa summit sa bulkan tungod sa mga peligro nga gipahinabo sa abo niini.
Ang PHIVOLCS hugot nga nagmonitor sa sitwasyon ug magpadayon sa paghatag og mga updates samtang giawhag sa lokal nga awtoridad ang mga residente nga magpabiling mabinantayon ug sundon ang mga instruksyon sa kaluwasan.
