Nakatala na sab og pagbuto ang Bulkang Kanlaon sa Negros Island Region kagahapon sa sayong gabii, adlawng Dominggo, Marso 15, 2026.
Sumala pa sa Philippine Institute of Volcanology and Seismology (Phivolcs) nga natala nila ang duha ka moderately explosive eruption sa bulkan nga nakapahinabo og 5 kilometer-high eruption column diin ang binugwak niini napalid sa direksyong habagatang-sidlakan ug amihanang-sidlakan.
Gani, nag-abiso na ang mga awtoridad sa posibilidad sa light to moderate nga ashfall sa mga kasikbit nga mga dapit sama sa Canlaon City sa Negros Oriental, San Carlos City ug La Castellana sa Negros Occidental, Balamban ug Asturias sa Sugbo tungod sa pagbuto sa bulkan.
Gipahimangnoan niini ang mga residente sa mga nahisgutang dapit nga magsul-ob og tukamang mask aron malikayan ang pagginahawas sa abo sa bulkan nga mamahimong makahatag og kadaot sa panglawas.
Abiso sab niini nga magpabilin sa sulod sa mga panimalay og pagasirad-an ang pultahan ug mga bintana sa kataas sa pagtagak sa mga abo.
Nagtimaan kini sa ikatulong higayon karong tuiga nga ang Kanlaon nialburoto diin ang nakalabay kay kaniadtong Pebrero 19 ug 26.
Padayong nakataas ang Alert Level 2 niini nga gimentiner ang no-entry sa 4-kilometer Permanent Danger Zone.
