CEBU – Nagmaya ang katawhan sa Canada human sa kadaugan sa Toronto Raptors sa championship game sa NBA Finals 2019 kaganihang buntag, (gabii sa US).
Gihulagway ni Faith Giduquio-Robertson nga hilabihan ang kalipay nila sa maong kadaugan kansang pinaka-una nga kasaysayan sa Canadian team nga nakasulud sa NBA.
Matud ni Robertson nga siguradong walay trabaho ang mga tawu sa Canada ugmang adlawa gumikan kay magbinuntagay kini sa ilahang selebrasyon.
Dugang pa, daw susamang adunay street party sa dihang midaug ang Raptors kung diin nagsayaw-sayaw, nagsaba-saba sa kadalanan, ingun man nga aduna pa’y fireworks display sa Jurassic Park kung diin gibana-bana nga mukabat sa dul-an 50,000 ka mga tawu ang milantaw sa duwa pinaagi sa usa ka wide screen.
Nanghinaut si Robertson nga dili lang unya kini ang unang higayun nga naghimu ug ngalan sa NBA ang Raptors, inay nga aduna pa’y mga umaabut nga kadaugan alang sa ilahang nag-inusarang basketball team.
