Patay nang miabot sa tambalanan ang usa ka caretaker sa usa ka restobar human giingong napakong ang ulo sa dihang nahulog kini sa hagdanan human nga gipatiran niadtong adlawng Sabado Hulyo 19 sa Barangay Daanlungsod lungsod sa Alcoy habagatang Sugbo.
Nailhan ang biktima nga si Edgardo Pasco, 55 anyos, caretaker sa restobar ug residente sa Bacolod City ug temporaryong nagpuyo sa naasoy nga dapit, samtang giila usab ang suspect nga si Philip Michael Jimenez Malba, 39 anyos.
Basi sa imbestigasyon sa Alcoy Municipal Police Station nasayran nga ang suspek kuyog sa iyang asawa sa maong restobar ug gikatahong nagkalalis, ug giingong mibadlong ang biktima ngadto sa suspect gumikan kay nakadisturbo na kini sa uban nga mga customers apan giingong nasuko ang suspek ug iyang gipatiran ang biktima hinungdan sa pagkahagbong niini sa hagdanan nga nag-una ang ulo ug napakong nga miresulta sa grabing kadaut nga nahiaguman.
Human sa maong insidente ang suspek daling misibat sa maong dapit apan daling mipahigayon og hot-pursuit operation ang kapulisan ug malampusong nasikop ang suspek sa Barangay Daanlungsod luyo nga bahin sa iyang sa boarding house diin nadiskubrehan nga nitago ilawom sa mga tanom.
Sa pagkakaron anaa na sa kustodiya sa mga sakop sa kapolisan ang suspitsado ug pasakaan kini og kasong Homicide. | Bombo Nathaniel Sandoval
