Nalunod ang usa ka liberian-flagged cargo ship nga adunay karga nga mga delikadong kemikal sa kadagatan sa Kerala, India, sumala sa taho sa Indian Navy gahapong adlawa.
Diin ang maong barko gisakyan sa 24 ka mga tripulante gikan sa nagkalain-laing nasud lakip na sa Georgia, Russia, Ukraine, ug Pilipinas, nga anaa na karon sa luwas nga kahimtang.
Nasayran nga naglawig gikan sa Vizhinjam paingon sa Kochi ang cargo ship o MSC ELSA 3 nga 184 meters ang gitas-on dihang nagpadala kini og distress signal niadtong Sabado.
Ang barko nakit-an sa Indian Navy aircraft 38 nautical miles sa habagatan-kasadpan sa Kochi, nga gikataho nga naglutaw sa usa ka delikado nga posisyon.
Sa usa ka pahayag, ang Indian Ministry of Defense miingon nga 640 ka mga sudlanan ang sakay sa barko, lakip ang 13 ka mga delikado nga kemikal ug laing 12 nga adunay calcium carbide – usa ka kemikal nga gigamit sa paghimo sa abono ug asero.
Ingon man nga nagdala usab kini og 370 ka toneladang lana ug gasolina, apan matod sa coast guard, wala pay natala nga oil spill sa maong lugar.
Samtang, ang Indian Coast Guard andam alang sa usa ka posible nga tubag sa polusyon batok sa hulga sa oil spill sa kadagatan sa Kerala.
