Nasagmuyo ang Catholic Bishops Conference of the Philippines (CBCP) sa bag-o lang nahuman nga State of the Nation Address (SONA) ni Presidente Ferdinand Marcos Jr., tungod wala kini manumbaling sa paghisgut sa online gambling.
Niingon si Rev. Fr. Jerome Secillano, CBCP Episcopal Commission on Public Affairs Executive Secretary nga wala sila makadungog sa ilang gipaabot gikan sa Presidente, nga mao untay lakang nga iyang buhaton batok sa naghitak nga online nga sugal sa nasud.
Iyang gitataw nga nanghinaut siya nga ang Presidente motutok sa pagsumpo sa online gambling tungod kay daghang mga batan-on ang naadik niini.
Matud pa niya, dili angay ibaliwala ang maong isyu tungod kay daghang pamilya ang naguba sa maong matang sa sugal.
Kahinumduman nga ang CBCP makadaghang higayon nga nanawagan sa gobyerno sa pagsumpo sa online gambling tungod sa negatibong epekto niini sa mga pamilya.
