Makadawat og one-time fuel subsidy nga nagkantidad og 5,000 pesos ang mga Public Utility Vehicle (PUV) Drivers.
Ang maong subsidiya gagikan sa National Government, diin adunay 26,000 ka mga PUV Drivers ang makabenipisyo niini, kini magsugod human sa Semana Santa.
Sumala ni Palace Press Officer Claire Castro niadtong Martes, Marso 17, sugdan ang sunod nga hugna sa distribusyon sa mga siyudad gawas sa Metro Manila sa dihang mahuman na sa Department of Social Welfare and Development (DSWD), Department of Transportation (DOTr), ug Land Transportation Franchising and Regulatory Board (LTFRB) ang pag-finalize sa listahan sa mga benepisyaryo.
Una nang naka apod-apod ang gobyerno og fuel subsidy sa hapit 139,000 ka tricycle drivers sa Metro Manila, diin sa sunod nga batch niini, target ang 261,156 ka transport workers sa kapital lakip na ang TNVS drivers, motorcycle taxi riders, bus drivers, ug jeepney operators.
Samtang sa Central Visayas, gipadayag sa LTFRB nga 26,833 ka PUV drivers ug operators sa Sugbo, lakip ang jeepney, bus, taxi, ug transport network vehicle service driver, ang kwalipikado sa ?5,000 nga ayuda.
Ihatag ang subsidy pinaagi sa fuel cards o direct cash transfer, depende kung unsay kasamtangang account sa benepisyaryo.
Ang mga driver nga operator usab mahimong makadawat og duha ka subsidy, samtang ang informal transport workers sama sa “habal-habal” drivers mahimong mo-apply sa Assistance to Individuals in Crisis Situation (AICS) program sa DSWD.
Matod ni LTFRB-7 Chief Transportation Development Officer Eugenio Ibo Jr., magsugod ang distribusyon sa rehiyon mga usa ka semana human sa rollout sa Metro Manila.
Dugang pasabot niya nga ang mga operators maoy mosalo sa dagkong gasto susama sa maintenance sa sakyanan, mao nga apil sila sa programa.
Apan, adunay pipila ka miyembro sa Cebu Provincial Board nga nagpahayag og kabalaka sa parehas nga kantidad sa subsidy alang sa drivers ug operators.
Apan, gipamatud-an ni Ibo nga nasabtan nila ang kabalaka apan giingon nga tumong sa programa ang pagpaubos sa gasto sa operasyon samtang ginabantayan usab ang pliti sa mga pasahero.
Kabahin ang fuel subsidy sa mas lapad nga tubag sa gobyerno sa pagsaka sa presyo sa lana tungod sa gubat sa Middle East.
