Nagpatuman ang Department of Education (DepEd) og mas estrikto nga mga silot batok sa mga estudyanteng nalambigit sa seryosong bullying, pisikal nga pag-atake, ug uban pang mga buhat nga mahimong makapahimulos sa kaluwasan sulod sa eskwelahan.
Gilatid kini sa DepEd Order No. 006, s. 2026, o ang Guidelines on Ensuring a Safe and Motivating Learning Environment (ESMLE), nga naglatid og lain-laing disciplinary measures depende sa kagrabe ug kasubsob sa paglapas.
Alang sa seryosong mga kalapasan sama sa balik-balik nga bullying ug online harassment, mahimong ipahamtang ang hangtod lima ka adlaw nga suspensyon ug referral ngadto sa Department of Social Welfare and Development (DSWD) alang sa unang paglapas.
Alang sa ikaduhang paglapas, mahimong dili na i-readmit ang estudyante, samtang exclusion ang mahimong silot alang sa ikatulo nga paglapas.
Alang sa mga high-risk nga kalapasan, lakip ang grabe nga pisikal nga pag-atake, bomb threats, ug delikadong mga limbong, mahimong ipahamtang ang dili pag-readmission alang sa unang paglapas, permanenteng exclusion alang sa ikaduhang paglapas, ug referral ngadto sa mga awtoridad.
Sumala ni Education Secretary Sonny Angara, dili mokompromiso ang DepEd sa kaluwasan sa mga estudyante, bisan pa man sa paghatag og higayon sa mga nakalapas nga magbag-o sa ilang pamatasan.
Samtang, mahimong mopahamtang ang school principal og hangtod 30 ka adlaw nga preventive suspension samtang giimbestigahan ang kaso kung ang estudyante giisip nga padayon nga hulga sa kaluwasan sa campus.
