Nakatutok ang Department of Social Welfare and Development (DSWD) sa pagtabang sa kapin 189,000 ka mga pamilyang naapektuhan sa El Niño.
Matod ni DSWD Assistant Secretary ug tigpamaba Irene Dumlao, nagpadayon ang paghatag og family food packs, mga sudlanan sa tubig ug uban pang non-food items sa mga komunidad nga naigo sa grabeng hulaw.
Mokabat na sa 68,905 ka benepisyaryo ang nakadawat og Emergency Cash Transfer (ECT) alang sa mga apektado sa El Niño.
Nagpadayon usab ang paghatag og pondo sa Region II, ilabina sa Isabela, samtang nagpadala ang DSWD og mga water tanker ug water treatment unit ngadto sa mga lugar nga nakasinati og kakulang sa tubig.
Nangandam usab ang ahensya sa posibleng paggrabe sa epekto sa El Niño, lakip ang hulga sa kakulang sa tubig ug pagkaon ug grabeng kainit.
Sa kinatibuk-an, miabot na sa 714 milyon ka pesos ang humanitarian assistance sa DSWD alang sa pagtubag sa epekto sa El Niño.
