CEBU CITY- Nagsugod na og paghatag og financial assistance ang Gobyerno sa Dakbayan sa Sugbo sa mga pamilyang naapektuhan sa kalamidad, bisan wala pa maabot ang ayuda gikan sa Department of Social Welfare and Development (DSWD) ug sa National Government.
Matod ni Cebu City Mayor Nestor Archival, ang matag panimalay kansang balay hingpit nga nadaot makadawat og ₱5,000, samtang ₱2,500 ang ihatag sa mga pamilyang adunay partially damaged o nabahaan nga mga balay.
Sumala sa lokal nga kagamhanan, kabahin kini sa ilang emergency response aron adunay dayong suporta ang mga apektadong residente samtang naghulat pa sa dugang nga ayuda gikan sa nasyunal nga gobyerno.
Dugang sa Mayor nga daghan sa mga benepisyaryo ang nagpabilin sa temporaryong kapuy-an ug gamiton ang maong tabang alang sa ilang batakang panginahanglan.
Ang pag-apod-apod sa ayuda nagsugod niadtong Hulyo 30 ug molungtad hangtod Agosto 7, 2026.
Gikan sa Hulyo 30 hangtod Agosto 1, ipahigayon kini sa mga barangay gymnasium, multi-purpose complex, ug barangay hall.
Ang mga wala pa makakubra mahimo nang moadto sa Opisina sa City Treasurer gikan sa Agosto 3 hangtod Agosto 7.
Gihangyo sa lokal nga kagamhanan ang tanang benepisyaryo nga personal nga motambong ug magdala og usa ka balidong government-issued ID ug duha ka photocopy niini. Dili tugotan ang pagkuha sa ayuda pinaagi sa proxy.
