Nasikop ang usa ka magtiayon sa Barangay Tisa, Cebu City human giakusahan og exploitation ang ilang kaugalingong lima ka tuig nga anak pinaagi sa online aron makakwarta.
Gikumpirmar sa National Bureau of Investigation-Central Visayas (NBI-7) ang pagkasikop sa usa ka 25-anyos nga babaye ug sa iyang kapuyo nga pareho usab og edad, atol sa usa ka operasyon batok sa online sexual abuse against children (OSAEC) sa Sitio Tambisan, Tisa niadtong Setyembre 30.
Naluwas ang bata atol sa operasyon ug gibutang kini ubos sa protective custody sa Department of Social Welfare and Development (DSWD) sa Central Visayas.
Wala gibutyag ang mga ngalan sa mga suspek ug sa bata agi’g pagsunod sa mga balaod nga nanalipod sa identidad sa mga biktima ug mga indibidwal nga nalambigit sa mga sensitibong kaso.
Matod sa NBI-7, ang operasyon nagsugod sa impormasyon gikan sa Homeland Security Investigations (HSI) sa gobyerno sa U.S. sa Manila kalabot sa giingong pag-apod-apod ug pagbaligya online sa mga materyal nga nagpakita og child sexual abuse sa Pilipinas.
Tungod sa maong impormasyon, nagpahigayon og imbestigasyon ang NBI-7 aron mailhan ang mga indibidwal nga giingong nalambigit sa maong kalihokan sa Cebu City.
Subay niini, mipasalig ang mga otoridad nga magpadayon sila sa pagmonitor sa posibleng mga kalihokan nga may kalabotan sa OSAEC sa Cebu ug sa paggukod sa mga indibidwal nga giingong nalambigit sa online sexual exploitation sa mga bata. via Bombo Rexmond Omega
