Nalangay sa pagdawat ang mga habal habal drivers sa fuel subsidy sa Dakbayan sa Sugbo bisan pa og giaprobahan na sa konseho ang 35-million pesos nga pondo alang sa ilang ayuda niadtong Abril.
Sumala ni Councilor Jun Alcover gituyo ang maong pondo aron makatabang sa mga habal-habal drivers sa pagsagubang sa pagsaka sa presyo sa gasolina.
Matud pa niya, kapin 9,000 ka mga aplikasyon sa habal-habal driver ang ilang gisumiter ngadto sa opisina sa mayor aron ma-accredit ug ma-organisar ang mga kwalipikadong benepisyaryo.
Apan, mitumaw ang problema human miabot sa 35,000 ang gidaghanon sa mga pangalan sa listahan, nga sumala sa mayor naglakip usab sa mga tawo nga matud pa dili lehitimo nga habal-habal drivers, ug igo lang nga mi-side line sama sa mga barangay tanod, call center agents ug ubang trabahante.
Tungod niini, gipahigayon ang validation aron masuta kon kinsa ang tinuod nga mga habal-habal drivers nga kwalipikadong makadawat sa ayuda, matud sa konsehal, miabot sa 13,000 ka mga drayber ang na-validate gikan sa 35,000 ka mga pangalan sa listahan.
Gilauman unta nga ma-release ang ayuda sa Oktubre 28 o 29 aron magamit sa mga drayber alang sa ilang panginahanglan sa panahon sa Kalag-Kalag.
Apan, niadtong Oktubre 22, nahibaw-an sa konsehal nga adunay kinahanglan nga mga requiremnts nga gipangayo sa Department of Social Welfare Services o DSWS ug sa accounting department sa dili pa maproseso ang pagpagawas sa pondo.
Lakip sa upat ka mga dokumentong kinahanglan isumiter sa mga na-validate nga benepisyaryo ang pormularyo nga adunay ilang pirma, photocopy sa lisensya sa pagmaneho, photocopy sa voter’s ID ug litrato nga nagpakita kanila uban sa ilang motorsiklo.
Matud sa konsehal, kapin 2,000 pa lamang sa 13,000 ka mga na-validate nga drayber ang nakakompleto sa maong mga requirements, tungod niini, dili pa mapasa sa accounting department ngadto sa city treasurer ang payroll alang sa pagpagawas sa ayuda.
Gipadayag usab sa konsehal ang iyang pagkadismaya tungod kay ulahi na nga nahibaw-an ang maong mga requirements nga matud pa niya, unta gipahibalo sa sinugdanan pa lang sa proseso aron malikayan ang dugang nga paglangan sa pagkuha sa subsidy.
Nagkanayon si Alcover, nga ang naka-kumpleto sa requirements nga 2,000 ka benepisyaryo sila una ang unang mahatagan ug ang katong uban isunod lang kung kanus-a nila makumpleto.
