Personal nga gitunol ni Presidente Ferdinand Marcos Jr. ang P100 milyon nga tabang pinansyal ngadto kang General Santos City Mayor Lorelie Pacquiao atol sa pagbisita sa Presidente sa Mindanao.
Ang maong pundo gamiton alang sa pag-ayo sa General Santos City Hall.
Sumala ni Presidente Marcos, ang pundo gikan sa Local Government Support Fund.
Gipahibalo usab sa Presidente nga ang tanang pamilya sa mga namatay makadawat usab og P50,000 nga tabang.
Basi sa pinakabag-o nga rekord sa National Disaster Risk Reduction and Management Council, moabot sa 46 ka indibidwal ang gitaho nga namatay tungod sa linog.
Mohatag usab si Presidente Marcos og tabang pinansyal sa mga lokal nga gobyerno sa Sarangani ug South Cotabato alang sa pag-ayo sa nadaot nga imprastraktura.
Si Presidente Marcos miingon nga ang Sarangani mao ang pinakagrabe nga naapektuhan nga lugar sa Mindanao.
Samtang, gimandoan ni Presidente Ferdinand Marcos Jr. ang mga hingtungdang ahensya sa gobyerno nga paspasan ang paghatag og tabang ug pag-ayo sa imprastraktura alang sa mga biktima sa kusog nga linog.
Niadto ang Presidente sa Gensan karong adlawa aron personal nga susihon ang sitwasyon ug ipang-apod-apod ang hinabang.
Gipasalig usab sa Presidente nga ang National Housing Authority (NHA) naka-focus usab sa pagtabang sa mga magtutudlo ug uban pang mga residente nga nakasinati og kadaot sa ilang mga balay.
Gawas sa inisyal nga mga hinabang, pagkaon, ug serbisyong medikal, gipasalig usab sa gobyerno ang pinansyal nga tabang alang sa mga trabahante nga naapektuhan sa temporaryo nga pagsira sa mga establisemento ubos sa no work, no pay system.
Ang maong tabang ipang-apod-apod pinaagi sa Assistance to Individuals in Crisis Situations (AICS) program sa Department of Social Welfare and Development (DSWD) ug sa Tulong Panghanapbuhay sa Ating Disadvantaged/Displaced Workers (TUPAD) sa Department of Labor and Employment (DOLE).
Sa samang higayon, gimando sa Presidente ang paspas nga pagtimbang-timbang sa mga nadaot nga mga bilding aron mahibal-an kung giunsa kini dali nga mabalik sa normal nga operasyon. Gipadali usab sa mga awtoridad ang pag-abli sa mga nabara nga dalan aron mas paspas nga maka-access ang mga relief vehicle, ingon man ang pagpahiuli sa suplay sa kuryente ug tubig sa mga apektadong komunidad.
Naglaum ang Presidente nga mohunong na ang mga aftershock aron makapadayon ang mga operasyon sa gobyerno sa paghawan ug pagbangon.
