Anaa sa 52 ka mga panimalay ang naugdaw ug 101 ka pamilya sa Barangay Mambaling, Siyudad sa Sugbo ang nagkinahanglan og pinansyal nga tabang, pagkaon, ug mga materyales sa pagtukod og balay human miigo ang sunog sa Sitio Lawis niadtong Biyernes, Septiyembre 18.
Ang Cebu City Department of Social Welfare and Services (DSWS) nakatala og 375 ka mga indibidwal gikan sa mga apektadong pamilya sa ilang pasiunang pagsusi, upat ka mga balay ang nakaangkon og partial nga kadaot samtang ang usa giklasipikar nga gamay ra ang naapektohan, sumala sa taho.
Girekomendar sa DSWS nga ikonsiderar ang paghatag og pinansyal nga tabang gikan sa disaster fund sa siyudad ngadto sa mga apektadong indibidwal nga nawad-an og pinuy-anan.
Dugang pa niini, gisugyot sa buhatan ang pagpanghatag og mga relief good, lakip na ang bugas, nagkalain-laing mga produkto, ug mga materyales sa pagtukod og balay alang sa mga apektadong pamilya ug indibidwal.
Nagsugod na usab ang DSWS sa pagparehistro sa mga biktima, diin ang beripikasyon ug balidasyon gikatakda nga himoon sa una ug ikaduhang adlaw human sa insidente.
Nadawat ang sunog pasado alas 3:26 sa hapon niadtong Biyernes ug gideklarar nga fireout sa alas 5:30 sa hapon, sumala sa Cebu City Fire Station.
Natala sa Bureau of Fire Protection ang 33 ka mga istruktura nga naugdaw sa lugar nga gibanabanang may gidak-on nga 800 square meters. Matod sa mga awtoridad, ang mga balay nga nasunog ginama sa mga light materials.
Matud ni Wima lapaz, Focal Person sa GAD sa Barangay Mambaling, nga hagit sa barangay ang pagpagawas og budget alang sa mga biktima gumikan sa election ban nga ipatuman subay sa padayong preparasyon sa BSK-Elections.
