Abtik nga lakang aron maseguro ang seguridad ug kaligdong sa umaabot nga 2025 National and Local Elections, ang Cebu City Police Office (CCPO), nipatawag og importanteng tigom gahapon, Mayo 6, 2025.
Kini subay sa 5 nalang ka-adlaw nga nahabilin sa dili pa ang adlaw nga piniliay.
Nangulo sa nahisgutang sesyon mao ang Acting City Director, PCOL EnricoEvangelista Figueroa
Ang sentro nga gipunting sa diskusyon mao ang detalyado nga plano sa pag-deploy alang sa panahon sa eleksyon.
Si PLTCOL Miguel Andeza, Chief City Operations Management Unit (COMU), nagpresentar sa plano, nga nagpasiugda sa piho nga mga assignment sa mga personahe sa mga polling center sa tibuok siyudad.
Gawas sa pagdeploy sa mga kawani, ang meeting naghisgot usab sa mga kritikal nga aspeto sa operasyon.
Ang mga diskusyon naglakip sa pagtukod sa usa ka dedikado nga Monitoring Center alang sa real-time nga pagdumala, ang pagporma sa usa ka espesyal nga “Kontra Bigay” nga grupo aron sa pagbatok sa mga iregularidad nga may kalabutan sa eleksyon, ug ang pagpaaktibo sa Anti-Criminality ug Quick Reaction Teams aron masiguro ang paspas nga pagtubag sa bisan unsang insidente.
Sa iyang panapos nga mga pulong, gisubli ni PCOL Figueroa ang mga direktiba ni PBGEN Redrico Maranan, ang Police Regional Office 7 (PRO7) Regional Director, nga nagpasiugda sa estratehiko ug epektibong deployment sa mga personnel sa adlaw sa eleksyon.
Dugang niana, gipahinumdoman ang tanang nanambong nga kinahanglan nga ipadayon ang estrikto nga non-partisanship ug aktibong pagtampo sa luwas, limpyo, ug matinud-anon nga proseso sa eleksyon.(Bombo Irene Ardiente)
