CEBU CITY-Nakig-koordinar na ang mga kapulisan sa Labangon ngadto sa Pamilya ni Rhea Mae Tocmo alang sa pagpasaka og kaso kang Simeon “Gabro” Gabutero.
Gitino ni Police Major Angelito Vallaser nga kon gani dili makaabot ang Pamilya sa Sugbo, sila na mismo ang magpasaka og kasong murder batok kang Simeon tungod sa mga ebidensyang nakuha.
Dugang pa sa opisyales nga lig-on na ang ilahang mga gihuptan nga mga ebidensya sama sa DNA sample ug mga CCTV footage nga nagtumbok kang Simeon.
Sa laing bahin, kasagmuyo ang nabati sa igsuon sa biktima tungod sa resulta sa imbistigasyon sa Labangon Police Station diin ang gidudahan nilang si Jewel Smith, kinsang higala sa biktima, nga gituohang adunay kalambigitan sa kamatayon sa 19-anyos.
Nanghinaot ang mga kapulisan ngadto sa Pamilyang Tocmo nga dili motuo sa mga sulti sa laing tawo ug ingon man ang mga gipangsulsol sa ilaha.
