CEBU CITY– Gi-awhag ang publiko nga magbinantayon batok sa lain-laing matang sa love scam karung buwan sa gugma nga nagpuntirya sa mga indibidwal nga nangita og mga romantikong partner.
Ang pahimangno ni Police Lieutenant Colonel Janette Rafter, Deputy Director for Operations sa Cebu City Police Office (CCPO) nga magmabinantayon ilabi na kong ang tanyag nga gugma lisod katuohan.
Mag-agad na kini sa indibidwal kung magpatuo kung angay ba ang mga offer alang kaniya.
Kinahanglan mabinantayon sa kaugalingon, ug dili dali magpatuo gumikan nga nagkadaghan ang mga scammers sa social media.
Niila ang Scam Watch Pilipinas kaniadto og walo ka naandang profile sa mga love scammers.
Kini mao ang Sad Boi, Sad Gurl; Manloloko; investor; Serviceman; Escort; Blackmailer; Slow burn, ug Predator.
Gihimug-atan niini kung adunay mopadayag og gugma pagasusiha kini ug dili dali magpadala sa mga tam-is nga pasalig.
