Nipahimangno ang Cebu City Police Office sa publiko nga magmatngon sa “Uhipan” o “Centipede” modus subay sa nagkaduol nga Christmas season diin kasagarang mabiktima ang mga commuters sa Public Utility Vehicles (PUVs)./
Nasayran nga ang naasoy nga modus sa mga sindikato kay ang mga biktima ang mga pasahero sa jeep, bus, UV express ug uban pa diin ang mga suspek dili dayon mailhan gumikan mosagol man sila sa mga sumasakay.
Matud sa pahimangno sa kapulisan nga adunay iyabo ang mga sindikato og likido, itagak nga sensiyo o kunohay dunay emergency, ingon man ang dili ordinaryong pagsikit bisan paman og daghan pang bakanting lingkoranan sa PUV.
Lakip usab niini ang balik-balik nga pagdumbol-dumbol sa ilang biktima og kung makakawat na kini dungan ra usab silang manganaog sa pampasaheroang sakyanan.
Busa, nipahinumdom ang kapulisan sa mga manakayay nga sigurohong nakasirado ang zipper sa mga bag ug likayan nga ibutang sa likod ang bag o backpack.
Ingon man nga magmatngon kung adunay kalit nga kagubot o komosyon sa palibot sanglit sa maong higayon moataki ang maong mga sindikato.
Atol sa pakighinabi sa Bombo Newsteam kang PCapt. Charisma Gonzales, ang tigpamaba sa CCPO nga giila na sa kapulisan ang grupo o miyembro sa modus ug kon gani maila na kay mosunod dayon sila sa operasyon batok kanila.
