CEBU CITY- Nangandam na sa sayo palang ang Cebu City Police Office (CCPO) alang sa seguridad sa Sinulog 2025.
Kini ang gipahibalo ni Police Lieutenant Colonel Maria Theresa Macatangay, Deputy City Director for Operations sa CCPO diin karon palang ila nang gisuta ang routa sa Sinulog Grand Parade para sa Enero 2025.
Agi kini og assessment kung asa nga bahin sa ilang deployment ang ilang palamboon aron sa hingpit nga pagpatuman sa seguridad sa kapistahan sa Sr. Sto. Niño de Cebu.
Uban sa walkthrough ang mga opisyales sa kagamhanang dakbayan sa Sugbo aron sab maila ang mga hagit sa kaluwasan sa publiko ilabi na sa mga istruktura sama sa Cebu Bus Rapid Transit Project sa Osmeña Boulevard.
Napanglantawan sa CCPO nga magdasok ang daghang mga tawo sa karon nga Sinulog subay sa pagbalik na sa naandan nga venue nga mao ang Cebu City Sports Center o ang karaang Abellana Sports Complex.
Hinungdan nga gikinahanglan sa kapulisan sa dakbayan ang sayo nga pagdetalye sa lang security plan.
Kapin sa duha ka libo ka mga police ang giplanohan nga ipakatap sa kadalanan atol sa Sinulog Grand parade wala pay labot niini ang auxiliary forces nga gikan sa AFP Visayas Command, Philippine Navy, Philippine Coast Guard ug uban pa.
Lakip sa gipatutukan ni Police Lt Col. Macatangay ang mga criminal nga modagsa usab sa pagpangabot sa dakbayan sa Sugbo sa maong panahon aron mamiktima sa mga bisita gikan sa lain-laing lugar sa nasud ug mga langyaw nga mga turista.
Tungod niini nanawagan sila sa publiko nga magbantay sila sa ilang mga gamit ug dili hatagan ang mga dautang elemento nga maka biktima kanila samtang nag suroy-suroy sila sa mga kalingawan sa dakbayan sa Sugbo.
