Nagpabiling alerto ang Cebu City Police Office (CCPO) kalabot na sa mga posibleng kalihokan nunot sa nagpadayong impeachment trial ni Vice President Sara Duterte.
Mao kini ang gikabutyag ni PLTCOL Franco Rudolf Oriol, ang eputy City Director for Administration sa CCPO, diin siya nagkanayon nga bisan pa anaa sa kaulohan nakasentro ang mga proseso sa impeachment trial sa bise presidente, dili gihapon angay nga magkompyansa ang mga kapulisan sa dakbayan sa Sugbo.
Ilabi na nga matod niya, adunay pipila ka grupo nga tigpaluyo sa bise presidente dinhi sa Sugbo, ug uban pang progresibong grupo nga mamahimong magpahigayon og mga aktibidad sa kadalanan ug freedom parks sa Sugbo.
Gihimug-atan usab ni Oriol nga kining mga partikular nga pundok adunay katungod gihapon sa ilahang tagsa-tagsa ka mga pagpadayag sa ilahang suporta sa bise presidente, ug giklaro usab nga girespitaran kini sa mga sakop sa kapulisan ang maong katungod.
Apan, wala usab gisalikway ni Oriol ang importansya sa matag balaod nunot sa paghatag og kahigayonan sa mga nagkadaiyang grupo sa pagpahigayon og kalihokan sama sa lihok-protesta.
Busa, gitataw ni Oriol nga gi-andam na ang nagkadaiyang police stations sa Sugbo sa bisan unsang posibleng kalihokan.
