CEBU CITY-Naka-rescue sa dili muminos sa 98 ka mga menor-de-edad human mipahigayon ang Cebu City Police Office (CCPO) og Oplan Bulabog kaniadtong Dominggo sa gabii, Pebrero 23, 2025.
Matod pa sa CCPO nga nagdeploy kini sa sobra 100 ka mga personahe niini sa mga nagkadaiyang dapit sa dakbayan sa Sugbo sa pagpatuman niini sa mga lokal nga mga ordinance ug pagsiguro sa pagpalig-on sa public safety.
Tanang 11 ka mga police stations sa dakbayan ang milusad sa maong operasyon inubanan sa mga specialized units niini nga gipangulohan ni CCPO Acting City Director Police Col. Enrico Figueroa.
Matod sa mga awtoridad nga naka pahigayon kini og ‘checking” sa 600 kapin ka mga indibidwal nga miresulta sa ilang pag-rescue sa 98 ka mga menor-de-edad nga nakalapas sa curfew regulations sa dakbayan.
Dugang pa nga lain 29 ka mga indibidwal ang nakadawat og violation tickets sa mga public misdemeanors sama sa public smoking, public alcoholic drinking, vandalism, public urination, public nudity ug uban pa.
