CEBU CITY-Nakasakmit og P532,000 nga balor sa ilegal nga drugas ang Cebu Provincial Police Office kon CCPO human gipahigayon ang 3 ka adlaw nga Simultaneous Anti-Criminality Law Enforcement Operations kon SACLEO kini subay sa gipakusgan nga kampanya batok sa ilegal nga drugas.
Gidumala ang 3 ka adlaw nga Simultaneous Anti Criminality Law Enforcement Operations (SACLEO) sa tibuok rehiyon sa Central Visayas sa nakalabay nga Disyembre 21-23, 2023.
Gibutyag ni Police Major Windell Abellana, Tigpamaba sa Cebu Provincial Police Office nga mokabat sa 45 ka mga indibidwal ang ilahang gihatagan og warrant of arrest sa mga Probinsya sa Sugbo.
Dugang niini, ang mga nakumpiska nga illegal nga drugas gibana-bana nga mokabat sa 78.31 grams sa gidudahang white crystalline substance o giila mga shabu nga adunay Standard Drug Price nga Php 532,508.00.
Samtang, mokabat sa 29 ka mga tawo ang nasikop nga gilangkuban sa duha ka Most Wanted Persons ug 27 ka Other Wanted Persons.
